مدونة بودييا مواهب الزمن الجميل هفهفي
لما سمعت من كام يوم عن النصابة الجديدة اللي اسمها مواهب دي أول حاجة جت في دماغي حلقات برنامج عمرو خالد على قناة إقرأ من خمسة وعشرين سنة اللي كان بيقول فيها قصص خيالية تماما وينسبها للتاريخ الإسلامي ويطلع منها موعظة من تنتوفة صغيرة كده زي الأستاذ فتحي نوفل في طيور الظلام وهو بيفصص القضية.
بس يعني إذا ما أرجعنا الأمر لنظرية العود الأبدي هنلاقيها مش غريبة، قبل عمرو خالد كان في عمر عبدالكافي (اللي لسه بيهبد لغاية دلوقتي يخرب بيته مبيموتش!) والشيخ كشك والزنداني، إلخ إلخ، كل جيل عنده طقم النصابين بتوعه والدين بضاعة مبتخلصش وأكل عيش للملايين يالله حصل خير. وبعدين يا أخي ده مفيش دين أم أي إبداع في الموضوع، لو داعية ست بتفتح محل جلاليب وطرح ولو داعية راجل بيفتح شركة سياحة يعمل رحلات عمرة ولو داعية سلفي (بعتبر السلفيين نون بايناري علشان .بينيكوا أي حاجة بتمشي على الأرض) بيفتح محل يبيع كتب وسبح ومسك
وعموما إنزعاج الناس من إن حد بيتكلم في الدين وهو غير أزهري شئ مضر وخطر للمجتمع في رأيي وقاتل للتفكير النقدي الحر، يعني انتوا بدين أبوكم متضايقين من ديكتاتورية الدولة في كل حاجة بس هتيجوا على التفكير في الدين اللي بيمس حياة ملايين البشر وهتقلبوا سلطويين عايزين ديكتاتورية للأزهر؟ آه هيطلع لنا مواهب بس في نفس الوقت هيطلع لنا جمال البنا وفي النص هيطلع نصابين تنوير.
بس الجديد في المواهب دي (أنا آسف عالتنمر بس فعلا مش قادر اتعامل مع إسمها بجدية، اللي هو أحه يعني دي عائلة اتفشخت تنمر طول حياتها هيطلعوا واحدة سوية ازاي؟) إنها بتمارس مهنة النصب الديني في مدارس انترناشونال وعلى أطفال. وهي دي مشكلتي الحقيقية، المستوى المنحط اللي وصل له التعليم في مصر لدرجة ان نصابة زي دي ضربت طرحة وقرت كتابين دعويين تشتغل في مدارس الناس بتدفع فيها مئات الآلاف كل سنة علشان تعلم عيالها؟
في أي حد في الدولة بيراقب على تعيينات المدرسين في المدارس الخاصة؟ هي آه خاصة بس خريجين المدارس دي عايشين معانا في المجتمع فمعلش المفروض الدولة يكون لها يد في المراقبة على المدارس دي بشكل أو بآخر؟
يعني احنا مستحملين تدين التجمع والشيخ زايد اللي قارف ميتين أبونا دلوقتي وكان نتيجة دروس عمرو خالد من عشرين سنة، كمان هنستحمل إرهابيين التجمع؟ أحه!
الواحد طول عمره بيعرف يتعامل مع إرهابيين امبابة، إنما أطفال التجمع الخامس اللي هيكبروا ويحاولوا يرهبونا بالانجليزي دول هنتعامل معاهم ازاي طيب؟ لو شخرت لهم مش هيفهموا!