أصعب من أن تُشرح أو تُفهم

العلوم الإنسانية مش معقدة أو غريبة لكن أعتقد كونها غير ملموسة أو مرئية بشكل واضح بيخلي فهمها صعب على كتير من البشر، ده مش إهانة للناس دي فعلا ولا تعالي لكن هم البشر مختلفين مش بسبب أعراقهم بس لكن بسبب الطريقة اللي مخ كل واحد فيهم بيشتغل بيها. 

في ناس بتفهم الفيزياء بمنتهى السهولة، ناس بتفهم في التجارة والمعاملات المالية بسهولة، وناس بتعطل قدام حاجات بسيطة جدا بينما الشئ اللي بيعملوه في حياتهم اليومية ممكن يعتبر خيال علمي بالنسبة لإخواتهم.

قيم زي الوطن، الأرض، المقاومة في مواجهة عدو بكل الحسابات المنطقية يستحيل الانتصار عليه، صعب شرحها فعلا لناس كتير. مش معنى كده ان مفيش منطق وراهم، بالعكس في تفسير منطقي لكن مش كل الناس هتفهمه بغض النظر عن طباعهم أو قناعاتهم.

حماس محركتش الناس دي علشان ترجع للشمال، الناس رجعوا لوحدهم مع أول فرصة، سهل اني أقول ان الناس بتفكر بمنطق "خيمة في الشمال زي خيمة في الوسط" طيب راجعين ليه؟ مئات الآلاف رجعوا بشكل تلقائي مع أول فرصة ليه؟ كلهم فكروا بشكل استراتيجي علشان يدعموا موقف المقاومة في المفاوضات اللي جاية؟ بالتأكيد لا، بيحاولوا يحافظوا على أراضيهم من السرقة حتى لو البيت نفسه اتهدم؟ شئ غير عقلاني أو منطقي. 

إستقر في الوعي الجمعي الفلسطيني إن العودة فرض مع أول فرصة حتى لو كانت العودة لأنقاض؟ مبفهمش أصلا حكاية "الوعي الجمعي" دي ولا بصدق فيها.

العقل التجاري التبادلي بيقول ان لو أسباب الحياة انتفت من مكان فالطبيعي ان الإنسان يهجر المكان ده وميحاولش يرجع له تاني. هتفهمه ازاي إن في شئ تاني أعمق من البحث عن لوجستيات الحياة (الضرورية والمهمة لنا كلنا بالتأكيد) بيحرك معظمنا كبشر حتى بدون ما ندركه. التشبث بالوطن ومحاولة البحث عنه طول حياتنا شئ فعلا صعب استيعابه.