مدونة بوديآفة حارتنا البيزيك بيتشز
واحد من التعبيرات الأمريكية الدارجة شديدة القرب إلى قلبي هو Basic Bitch ونفسي ألاقي له ترجمة لطيفة رقيقة سهل انتشارها في مصر، ممكن مثلا "شرموط بدائي" أو "شرموط بلا ملامح". هو المصطلح بيطلق على الناس اللي معندهاش أي طبقات مركبة في تصرفاتها أو أفكارها، زي مثلا لما حد يقول لك حل مشاكل مصر اننا نبني عمارات في الصحراء ونبيعها ونكسب أو نعمل قناة السويس بالجنيه المصري أو لازم تشتغل 16 ساعة في اليوم علشان تنجح، دي نوعية الأفكار اللي بتيجي للبيزيك بيتش.
طريقة تفكير سطحية بلا أي عمق وقديمة ومستهلكة وعدى على إثبات عبطها عشرات السنين بس لسه بتيجي للبيزك بيتش وكأنه لقى مفتاح الحياة.
المشكلة بتحصل لما البيزك بيتش يمسك ميكروفون أو يبقى عنده سلطة أو فلوس تخلي ناس تعرص له وتعامله باحترام. يالهوي يانا عاللي بيحصل، يعني لما راجل غلبان يقول لك "إحنا نخلي قناة السويس بالجنيه المصري" بتاخده على قد عقله وخلاص معلش مهو مش هيقدر يعمل حاجة بالكلام ده يعني، لما نبقى عايشين في ديموقراطية صوته فيها له لازمة نبقى نتناقش انما دلوقتي لما يبقى نفسه في الجنيه أعطه الجنيه.
بس لما بيطلع راجل مثقف يعمل معركة وهمية للدفاع عن بوسة في فيلم ضد قوى الظلام بتبقى حاجة بضان أوي ومستهلكة، اللي هو كسم خناقات التسعينات دي يا جماعة. ما طول بقاء البشرية هيبقى في ناس بتغضب من بوسة في فيلم وبتودي وشها الناحية التانية وتحاول تمنع عيالها يشوفوا الفيلم ده، سيبه يا سيدي يتضايق ويسب ويلعن على فيسبوك مجراش حاجة.
ولا لما يطلع واحد غني يقول لك مفيش حاجة اسمها وورك لايف بالانص ولازم اللي بيشتغل معايا يشتغل 12 ساعة في اليوم 6 ايام في الأسبوع بتبقى حاجة عرة أوي أوي، الجهل بنظريات العمل والقيمة اللي هي حاجات عدى عليها أكتر من 200 سنة والله وبياخدوها في سنة أولى اقتصاد تقريبا ويقول لك رجال أعمال وانتربرونورز وهباب.
الواحد من ساعة ما وعي على الدنيا وهو مدرك ان مصر مفيهاش رأسماليين يتخانق معاهم ويادوب في اتنين تلاتة ليبراليين ممكن تحط لهم طبق بقسماط وكباية نسكافيه وتسيبهم وتمشي هم مش هيعملوا دوشة. بس يعني الموضوع بيزداد قرفا انك محتاج تشرح لكبارات البلد أساسيات دين أم الحياة والعلم قبل ما تشتبك مع أفكارهم وحط مليون خط تحت أفكارهم دي. الواحد بضانه ورمت من الاشتباك مع البديهيات وخايف في العشرة ولا عشرين سنة اللي فاضلين لي في الحياة في مصر ألاقي نفسي بشرح لشحط بالغ ما هي الجاذبية الأرضية وأهمية المياة للزراعة.
العوض عليك يا رب...