BooDy's HomePage

فوطة صفرا، خرقة، هرمة، أو شرموطة. كلها مرادفات تستخدم حسب الموقف و الطبقة الاجتماعية للقائل لوصف قطعة من القماش تستخدم لمسح أي قذارة تلاقيها قدامك. غالبا بتستخدم الفوطة الصفرا و ترميها على جنب لغاية ما تتبهدل تماما فلو كنت غلبان على قد حالك هتغسلها و تعيد استخدامها أما لو كنت مقتدر و معندكش أي اهتمام ولو شكلي بتوفير المصادر الطبيعية هتبص للفوطة بقرف بعد ما تتوسخ و تمسكها بطراطيف صوابعك أو باستخدام منديل كلينكس من ابو ريحة و ترميها بره عربيتك و عند أول إشارة هتنده للشاطرة (ايه شاطرة دي؟؟؟ قالشه فشخ و هربانة من الاربعينات طحن و عليها تراب) اللي واقفة عندها و تشتري منها فوطة جديدة.

إنها من أهم نواميس الكون، العرص ينتصر دائما. بدأت من قابيل و هابيل (ده إذا كنت مؤمن بحقيقة قصتهم يا عزيزي، يمكن تكون كافر من بتوع التطور و مش مصدق انهم كانوا موجودين. أعذرني فأنا دائما و أبدا بحاول احترم كل العقائد حتى العقائد الزباله لا يمنع انها زبالة ان الواحد يحترمها برضو). استمرارا على مر التاريخ انتصر العرص في كل فرصة أتيحت له، ممكن تقولي بس يا استاذ ساعات الخير بينتصر على التعريص، أقول لك قدامك رد من اتنين و اختار لك واحد فيهم و متقرفنيش بالجمل الاعتراضية كتير يا روح امك انا مش فايق لك، إما أنهم الاستثناء الذي يثبت القاعدة أو الرد الأكثر منطقية ألا و هو إننا كلنا يا عزيزي معرصين بطريقة أو بأخرى.

كل الكلمات عبث، حماقات مكرره بلا معنى سوى لكتابها، حزن، ابتهال للآلهة، تأمل، شعر، حب في الحياة و الموت، تراتيل حمقاء يتلوها مجموعة من الحمقى، يدورون في حلقات مفرغه و تدور حولهم عبثيات الحياة. كلنا مجموعة من الحمقى يجمعنا الأمل فإذا فقدناه فقدنا معه الحماقة و ربما الحياة.

بعد حوالي أسبوع من الصمم الجزئي في سؤال بيطرح نفسه، هو انا ليه اتعالجت؟

مسمعتش صوت عياط الأطفال و انا راجع في رحله 6 ساعات في الأوتوبيس.
مخدتش بالي ان الركاب بيتخانقوا مع سواق الميكروباص على الأجره غير بعد ما الخناقه خلصت.
في نفس الميكروباص مسمعتش صوت القرآن العالي اللي السواق مشغله طول السكه (مع إنه حرامي و خد أجره زياده).
سواقين التكاسي رحموني من مغامراتهم و انتصاراتهم الوهميه على ظباط المرور بمجرد إشاره لما بيبدأ القصه اني مبسمعش.
كنت سامعه شويه بس ضميري كان مستريح مش عارف ليه و انا متجاهل جرس التليفون و جرس الباب.
صحيح مسمعتش أكتر صوت بحبه لكن اترحمت من إني في نفس المكان اسمع أكتر صوت بكرهه و مستني اللحظه اللي يختفي فيها من حياتي.

مش أحسن حاجه تعملها و انت مخنوق انك تقعد تسترجع في ذكرياتك الحلوه أو الوحشه. تقابل قريبك أو صاحبك اللي اتربيت معاه، كل واحد فينا عنده نسخه من الشخص ده في حياته، إبن خالتك أو عمتك اللي في نفس سنك و كنتوا ساكنين جنب بعض و انتوا عيال و يمكن لغاية دلوقتي أهاليكم لسه ساكنين جنب بعض. هتفتكر لما كنتوا بتلعبوا مع بعض، لما كنتوا هتغرقوا في المصيف، أول واحده ست شفتوها و اتهبلتوا عليها في حياتكم، بنت الجيران اللي برضو كلنا عندنا نسخه منها، إلخ إلخ إلخ....

شخص: يا رب، يا رب انا تعبت من الدنيا و اللي فيها، إرحمني بقى يا رب
الله: ......
شخص: يا رب، يا رب انا عارف انك بتمتحني بس انا مش قادر خلاص. أعمل ايه يا رب دلني
الله: ......
شخص: يا رب، يا رب انت بتقول انك إذا حبيت قوم بتبتليهم، انت ابتليتني كتير أوي يا رب، يعني انت بتحبني؟
الله: ......
شخص: يا رب، يا رب أنا عارف اني غلطت كتير أوي، بس انت رحمتك واسعه، هو انت بتعاقبني يا رب؟
الله: ......
شخص: يا رب، يا رب و الله العظيم ده حرام اللي انت بتعمله في ده، إنت إيه يا أخي؟!
الله: ......
شخص: استغفرك ربي و أتوب إليك، أنا آسف يا رب، كانت ساعة غضب و الشيطان شاطر، سامحني يا رب
الله: ......
شخص: يا رب، طب انت خلقتني ليه طالما انت هتعذبني، انا مش عاوز اعيش كده يا رب، خدني بقى
الله: ......