من فوائد الصمم

Submitted by BooDy on Sun, 2009-09-27 12:31.

بعد حوالي أسبوع من الصمم الجزئي في سؤال بيطرح نفسه، هو انا ليه اتعالجت؟

مسمعتش صوت عياط الأطفال و انا راجع في رحله 6 ساعات في الأوتوبيس.
مخدتش بالي ان الركاب بيتخانقوا مع سواق الميكروباص على الأجره غير بعد ما الخناقه خلصت.
في نفس الميكروباص مسمعتش صوت القرآن العالي اللي السواق مشغله طول السكه (مع إنه حرامي و خد أجره زياده).
سواقين التكاسي رحموني من مغامراتهم و انتصاراتهم الوهميه على ظباط المرور بمجرد إشاره لما بيبدأ القصه اني مبسمعش.
كنت سامعه شويه بس ضميري كان مستريح مش عارف ليه و انا متجاهل جرس التليفون و جرس الباب.
صحيح مسمعتش أكتر صوت بحبه لكن اترحمت من إني في نفس المكان اسمع أكتر صوت بكرهه و مستني اللحظه اللي يختفي فيها من حياتي.

دلوقتي انا سامع صوت الشارع، و صوت السواقين، و صوت القرآن العالي، و صوت الخناقات، و حتى صوت الجرس. الحسنه الوحيده هي إني يمكن اسمع صوت بحبه قبل ما يختفي من حياتي هو كمان.

فعلا للصمم فوائد كثيرة في هذا الزمان


( categories: )